Sumqayıtda qətl törətməkdə təqsirləndirilən Mikayıl Şərifovun barəsindəki qərardan verilən kassasiya şikayətinə Ali Məhkəmədə iyulun 31-də baxılacaq. İşə hakim İlkin Rəcəbov sədrlik edəcək.
İttihama görə, hadisə 5 yanvar 2025-ci il tarixində Sumqayıtın Xəzər bağları ərazisində baş verib. Mikayıl Şərifov əvvəllər tanıdığı 1958-ci il təvəllüdlü Mehparə Ələkbərova ilə toyuqların zəhərlənməsi məsələsinə görə mübahisə edib. Daha sonra o, kərki tipli məişət aləti ilə qadının baş və üz nahiyəsinə çoxsaylı zərbələr endirib. Ağır kəllə-beyin travması alan Mehparə Ələkbərova 8 yanvar 2025-ci ildə xəstəxanada vəfat edib.
Mikayıl Şərifov məhkəmədə ittihamla qismən razılaşaraq hadisənin əvvəlcədən planlaşdırılmadığını bildirib. Onun sözlərinə görə, zərərçəkmiş əvvəlcə ona taxta parçası ilə zərbə vurub, o da özünü müdafiə etmək məqsədilə həmin aləti alaraq cavab zərbələri endirib. Təqsirləndirilən şəxs qadının öldürülməsi niyyətinin olmadığını, hadisədən sonra polisə özü məlumat verdiyini, həmçinin hadisə günü spirtli içki qəbul etdiyini etiraf edib.
Sumqayıt Ağır Cinayətlər Məhkəməsinin hökmü ilə Mikayıl Şərifov 18 il müddətinə azadlıqdan məhrum edilib.
Mənbə: Pravda.az
