Sumqayıtda dələduzluğa cəhddə təqsirləndirilən Samir Ələkbərzadənin (adı, soyadı şərtidir) barəsindəki hökmdən verilmiş apellyasiya şikayətinə baxılıb.
Qərara əsasən, Sumqayıt Apellyasiya Məhkəməsində apellyasiya şikayəti təmin edilməyib.
İttihama görə, Samir Ələkbərzadə Sumqayıt şəhəri ərazisində yerləşən 0,025 hektar torpaq sahəsində inşa edilmiş, ümumi sahəsi 76,6 kvadratmetr olan bağ evinin guya öz mülkiyyətində olduğunu zərərçəkmiş S.S.-ə bildirib. O, həmin evi 80 000 manata satacağını, bunun üçün isə əvvəlcə 20 000 manat ilkin ödəniş, qalan məbləğin isə aylıq hissələrlə ödənilməsini təklif edib.
İstintaqla müəyyən edilib ki, təqsirləndirilən şəxs 2023-cü ilin avqustundan 2024-cü ilin aprelinədək zərərçəkmişdən nağd və bank köçürmələri ilə ümumilikdə 21 860 manat alıb. Lakin təqsirləndirilən şəxs aldığı pullar müqabilində bağ evini satmaq barədə üzərinə götürdüyü öhdəliyi yerinə yetirmək niyyətində olmayıb.
Onun əməli etibardan sui-istifadə və aldatma yolu ilə külli miqdarda əmlakı ələ keçirməyə yönəlmiş dələduzluğa cəhd kimi qiymətləndirilib.
Sumqayıt Ağır Cinayətlər Məhkəməsinin hökmü ilə Samir Ələkbərzadə 4 il 11 ay 29 gün müddətinə azadlıqdan məhrum edilib.
Mənbə: Pravda.az
