Sumqayıt şəhərində tanışlar arasında insident baş verib.
Demokrat.az-ın məlumatına görə, hadisə 3-cü mikrorayonda yerləşən “Aviakassa”nın qarşısında baş verib. Yaşar adlı şəxs mübahisə zamanı tanışı Səbuhinin ağız nahiyəsinə yumruqla vuraraq ona xəsarət yetirib.
Hadisəni törədən Yaşarın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə təqsirləndirilən şəxs qismində ifadə verən Yaşar bildirib ki, bir müddət əvvəl işdən çıxıb:
“Bu məqsədlə iş axtardım və bu zaman Səbuninin “Mitsibushi Rosa” markalı avtomobilə sürücü axtardığını eşitdim. Söhbət zamanı Səbuhi maşınını sürməyimi, pula əl vurmamağımı, pula nəzarət etmək üçün maşında bir nəfər şəxsin olacağını, mənə də gündəlik 40-50 manat pul verəcəyini dedi. Bununla bağlı bizim aramızda razılıq əldə olundu”.
Təqsirləndirilən şəxs qeyd edib ki, daha sonra avtobuslara nəzarət edən qurumun əməkdaşları maşına əlavə avadanlıq qoşulduğu üçün maşına 150 manat cərimə yazıblar:
“Mən bunu Səbuhiyə bildirdim. Təxminən maşını götürdükdən 1 həftə sonra geri qaytardım. Daha sonra hadisə günü 3-cü mikrorayonda “Aviakassanın” qarısında olan zaman Səbuhi yaxınlaşaraq nalayiq ifadə işlətdi, nə üçün maşının cəriməsini ödəmədiyimi soruşdu. Cərimənin mənim səhvinə görə deyil, maşında olan əlavə avadanlıqla bağlı yazıldığını dedim. Bu zaman Səbuhi o cəriməni deyil, başqa cəriməni nəzərdə tutduğunu dedi. Mən də sürücülük vəsiqəsində olan bütün cərimələri ödədiyimi bildirdim. Bu zaman Səbuhi yenə nalayiq ifadə işlətdi. Mən də ona eyni formada cavab verdim. Bu zaman uzaqlaşaraq getmək istədikdə yenə arxamca söydü. Mən də geri qayıdaraq yumruq zərbəsi ilə onun ağız nahiyəsindən vurdum. Səbuhi vurduğum yumruğun təsirindən yerə yıxıldı. Bundan sonra uzaqlaşaraq getdim”.
İş üzrə zərərçəkmiş qismində ifadə verən Səbuhinin sözlərinə görə, “Mitsubishi Rosa” markalı avtomobili var:
“Həmin avtomobil ilə Bakı-Sumqayıt yolunda sərnişin daşınması ilə məşğul oluram. Həmçinin, həmin maşını gündəlik icarə əsasında da başqa şəxslərə icarəyə verirəm. Dializ xəstəsi olduğum üçün Astara rayonuna xəstəxanaya getdim. Xəstəxanaya gedən zaman da qeyd etdiyim avtomobili Yaşara gündəlik 40 manat ödəniş qarşılığında icarəyə verdim. Geri qayıtdıqdan sonra avtomobilin cərimələri olduğunu gördüm. Bununla əlaqədar olaraq dəfələrlə Yaşarla mobil telefonla əlaqə saxladım. Lakin Yaşar zənglərimə cavab vermədi. Bundan sonra həmin cərimələri özüm ödədim”.
Zərərçəkmiş qeyd edib ki, hadisə günü Sumqayıt şəhəri, 3-cü mikrorayon ərazisində Yaşarla qarşılaşıb:
“Ona qayda pozuntusu etdiyini, cərimələri onun əvəzindən ödədiyimi dedim. Yaşar cərimələri özünün ödədiyini iddia etdi. Bundan sonra aramızda mübahisə yarandı və Yaşar özünün cərimələri ödədiyini iddia edərək nalayiq ifadə işlətdi. Bu zaman mən də ona qarşılıq verdim. Daha sonra Yaşar yumruq zərbəsi ilə ağız nahiyəmdən vurdu. Bundan sonra yerə yıxıldım”.
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə Yaşar 1500 manat məbləğində cərimə cəzasına məhkum edilib.
