Sosial Xidmətlər Agentliyinin Sumqayıt Sosial Xidmət Kabinetinin benefisiarları üçün açıq havada master-klass baş tutub.
Sumqayit24.az xəbər verir ki, tədbirdə kabinetin sosial reabilitasiya xidmətlərindən yararlanan əlilliyi olan uşaqlar və onların valideynləri iştirak ediblər.
Əsas məqsəd sosial inklüzivliyin gücləndirilməsi, həssas əhali qruplarından olan şəxslərin sosial reabilitasiyasına dəstək göstərilməsi və asudə vaxtlarının səmərəli təşkil edilməsi olub.
Uşaqların sosial bacarıqlarının inkişafı və ətraf mühitlə yaxından tanış olması məqsədilə rəngləmə, müxtəlif interaktiv və komanda oyunları, musiqili çıxışlar, eləcə də peşəkar animatorların iştirakı ilə rəngarəng şou-proqram təşkil olunub.
İştirakçıların ünsiyyət bacarıqlarının, kollektiv fəaliyyət vərdişlərinin və özünəinamının inkişafına xidmət edən tədbir rəngarəng görüntülərlə yadda qalıb.
