Sumqayıtın Hacı Zeynalabdin qəsəbəsində kanalizasiya problemi vətəndaşların narahatlığına səbəb olub.
Sumqayit24.az-a bu barədə Şirvan yaşayış massivinin sakinləri məlumat veriblər.
Şikayətçilərin sözlərinə görə, ərazidə kanalizasiya sistemində yaranan problem səbəbindən çirkab sular yola, həyətlərə və yaşayış evlərinin qarşısına axır.
"Ərazi bir ildən çoxdur ki, bu vəziyyətdədir. Bura 32 nömrəli məktəbin və sakinlərin gediş-gəliş yoludur. Bir sözlə, mövcud vəziyyət həm piyadaların, həm də nəqliyyat vasitələrinin hərəkətində ciddi çətinliklər yaradır. Bundan əlavə, ərazidə antisanitar vəziyyət də yaranır", – deyə sakinlər bildiriblər.
Vətəndaşlar problemin aradan qaldırılması üçün aidiyyəti qurumların əraziyə baxış keçirməsini və tədbir görülməsini istəyirlər.
Məsələ ilə bağlı müvafiq quruma sorğu ünvanlanıb.
