Sumqayıt şəhərində 23 yaşlı oğlan dəniz sahilində qeyri-rəsmi münasibətdə olduğu qıza xəsarət yetirib.
Məlumata görə, hadisə Xəzər dənizinin Sumqayıt şəhərinin 6-cı mikrorayon ərazisinə düşən hissəsində baş verib.
Qeyd olunub ki, 2003-cü il təvəllüdlü Fərhad (ad şərtidir) qısqanclıq zəminində sevgilisi Turanə (ad şərtidir) ilə mübahisə edib.
Fərhad ifadəsində bildirib ki, Turanə ilə 2026-cı ilin yanvarında tanış olub. O, qızın ona xəyanət etdiyini düşündüyü üçün görüşmək istəyib. Gənc qızı yaşadığı binanın qarşısından avtomobillə götürərək dəniz sahilinə aparıb və qısqanclıq üstündə aralarında mübahisə yaranıb. "Mübahisə zamanı Turanə mənə əl-qol atmağa başladığından əsəbiləşərək onun sifətinə şillə ilə güclü zərbə vurdum", - deyə o, bildirib.
Turanə isə ifadəsində qeyd edib ki, münasibətlərinə son qoymaq istəsə də, Fərhad onu narahat etməyə davam edib. Hadisə günü söhbət etmək adı ilə onu dəniz sahilinə aparıb, xəyanətdə ittiham edib. Daha sonra sifətinə və başına zərbələr endirib, qollarını sıxıb və saçından tutub. O, əvvəlcə şikayət etməsə də, Fərhadın sonradan da onu narahat etməsi səbəbindən hüquq-mühafizə orqanlarına müraciət edib.
İşə Sumqayıt Şəhər Məhkəməsində baxılıb. Məhkəmə araşdırması zamanı məlum olub ki, təqsirləndirilən şəxs zərərçəkmişlə barışıb. Buna görə də Fərhad barəsində cinayət təqibinə xitam verilib və o, Cinayət Məcəlləsinin 73.2-ci maddəsinə əsasən cinayət məsuliyyətindən azad edilib.
Mənbə: Demokrat.az
