Sumqayıtda mikrorayonların birində yerləşən parkda oyun qurğularından istifadənin məhdudlaşdırılması narahatlıq doğurur.
Sumqayit24.az-a bu barədə şəhər sakinləri məlumat veriblər.
Şikayətçilərin iddiasına görə, 13-cü mikrorayonda, 19 saylı binanın yaxınlığında yerləşən oyun meydançasında sakinlərdən biri uşaqların oyun avadanlıqlarından istifadəsini məhdudlaşdırıb.
"Uşaq parkındakı oyun avadanlıqları qıfıl, tros və iplərlə bağlanıb. İctimai park nə vaxtdan kiminsə şəxsi mülkünə çevrilib? Həmin şəxs bildirir ki, uşaqların səs-küyü səbəbindən burada oturub dincələ bilmir. Hər axşam burada özü üçün çay süfrəsi açır, ərazidə oturur və heç kimin bura daxil olmasına icazə vermir", - deyə vətəndaş iddia edib.
Şikayətçilər aidiyyəti qurumdan məsələnin araşdırılmasını və problemin aradan qaldıırılmasını tələb edirlər.
