Sumqayıtda prospektlərdən birində piyadaların yol hərəkəti qaydalarına əməl etməməsi narazılıq yaradıb.
Bu barədə Sumqayit24.az-a şəhər sakinləri məlumat veriblər.
Şikayətçilərin sözlərinə görə, Sülh prospektində bəzi vətəndaşlar piyada keçidində işıqforun qırmızı işığına məhəl qoymadan yolu keçməyə çalışırlar.
Redaksiyamıza təqdim olunan videoda da görünür ki, işıqforda qırmızı işığın yanmasına baxmayaraq, bəzi piyadalar yolun hərəkət hissəsində dayanaraq hərəkətə hazırlaşır, ya da birbaşa yolu keçirlər.
Bu cür vəziyyət nəqliyyat vasitələrinin hərəkətini çaşdırmaqla yanaşı, həm də ərazidə qəza riskini artırır.
Vətəndaşlar aidiyyəti qurumlardan əraziyə baxış keçirilməsini, nəzarətin gücləndirilməsini və piyadalar arasında maarifləndirmə işlərinin aparılmasını xahiş edirlər.
