Sumqayıt Apellyasiya Məhkəməsində yol qəzası törətməkdə təqsirləndirilən Allahverdi Hüseynovun barəsindəki hökmdən verilən apellyasiya şikayəti üzrə məhkəmə iclası başa çatıb.
Məhkəmənin qərarı ilə Sumqayıt Şəhər Məhkəməsinin hökmü dəyişdirilib və ona 4 il 3 ay 2 gün müddətinə azadlıqdan məhrumetmə cəzası təyin olunub. O, cəzasını məntəqə tipli cəzaçəkmə müəssisəsində çəkəcək.
İttihama görə, 1962-ci il təvəllüdlü Allahverdi Hüseynov 2024-cü ilin noyabr ayında idarə etdiyi "Mercedes-Benz" markalı avtomobillə Sumqayıt şəhəri, Nizami küçəsi boyunca Azərbaycan prospekti istiqamətində hərəkətdə olarkən "Yol hərəkəti haqqında" Qanunun tələblərini pozub.
İstintaqla müəyyən olunub ki, Allahverdi Hüseynov idarə etdiyi "Mercedes-Benz" markalı avtomobillə yolda dayanmış iki avtomobilə çırpılıb. Zərbə nəticəsində avtomobillər arasında qalan piyada Cavanşir Quliyev ağır xəsarətlər alıb və sonradan xəstəxanada vəfat edib.
Sumqayıt Şəhər Məhkəməsinin hökmü ilə Allahverdi Hüseynov təqsirli bilinərək 5 il 1 ay müddətinə azadlıqdan məhrum edilib.
Mənbə: Pravda.az
