Sumqayıt şəhərində fəaliyyət göstərən "Nauka" Tədris Mərkəzi ilə bağlı ciddi iddialar səsləndirilib.
Sumqayit24.az-a müraciət edən Mehraliyeva Nuranənin iddiasına görə, azyaşlı övladı bağçada bir neçə dəfə fiziki zorakılığa məruz qalıb.
"Tədris Mərkəzinin iki filialı var. Övladımın getdiyi filial 5-ci mikrorayonda yerləşir. Hadisə isə yaxınlıqdakı idman kompleksinin həyətində təşkil olunan düşərgə zamanı baş verib.
Həmin ərazidə menecer uşağı çubuqla vurub. Qızım da həmin bağçaya gedir və baş verən hadisənin şahididir", - deyə Mehraliyeva Nuranə bildirib.
Bundan başqa, valideyn iddia edir ki, daha əvvəl də başqa bir müəllim övladının boğazından tutaraq ona qarşı kobud davranıb.
DİN Mətbuat Xidmətinin əməkdaşı Cəsarət Qənbərli Sumqayit24.az-a bildirib ki, iddialarla bağlı polis idarəsinə müraciət daxil olub:
"Müraciət üzrə prosessual araşdırma aparılır".
Məsələ ilə bağlı "Nauka" Tədris Mərkəzi ilə əlaqə yaratmağa çalışsaqda zəngimizə cavab verilmədi. Bundan əlavə, bağçaya şikayətlə bağlı sorğu da göndərilib.
