Sumqayıt sakinləri şəhərdəki ictimai sanitar qovşaqların vəziyyətindən olduqca narazıdırlar.
Bu barədə Sumqayit24.az-ın sosial şəbəkələrdə keçirdiyi sorğu zamanı şəhər sakinləri fikirlərini bölüşüblər.
Sorğunun nəticələrinə əsasən, sakinlərin böyük əksəriyyəti mövcud ictimai sanitar qovşaqların onları qane etmədiyini bildirib.
Şərhlərdə vətəndaşların bir qismi şəhərdə ictimai sanitar qovşaqların sayının kifayət qədər olmadığını qeyd edib. Digər şəxslər isə "sanitar qovşaq var ki?" ifadəsi ilə bu xidmətin demək olar ki, əlçatan olmadığını vurğulayıblar.
Bundan başqa, rəylərin bir hissəsində mövcud sanitar qovşaqlarda antisanitar vəziyyətin hökm sürdüyü, təmizliyin lazımi səviyyədə olmadığı bildirilib. Bəzi sakinlər isə sanitar qovşaqların tez-tez bağlı olması səbəbindən onlardan istifadə edə bilmədiklərini qeyd ediblər.
Rəylərə əsasən demək olar ki, sakinlar müvafiq qurumlardan ictimai sanitar qovşaqların sayının artırılmasını və təmizliyə diqqət yetirilməsini xahiş edirlər.
