Sumqayıtda yollarda işıqlandırma ilə bağlı şikayətlər səngimir.
Sumqayit24.az-a müraciət edən sakinlərin sözlərinə görə, Hacı Zeynalabdin qəsəbəsi, Şirvan yaşayış massivinə gedən yolda işıq dirəkləri olsa da, ərazidə işıqlandırma təmin edilmir.
Vətəndaşlar qeyd ediblər ki, xüsusilə gecə saatlarında ərazidə həm nəqliyyat vasitələrinin, həm də piyadaların hərəkətində çətinlik yaranır. Bildirilib ki, bu vəziyyət ərazidə qəza riskini də artırır.
"İşıq dirəklərinin heç biri işləmir, sanki maketdir. Bir neçə gün əvvəl burada hərbçini maşın vuraraq öldürdü", - deyə sakinlər narahatlıqlarını bildiriblər.
Vətəndaşlar aidiyyəti qurumlardan əraziyə baxış keçirilməsini və problemin aradan qaldırılmasını tələb edirlər.
Qeyd edək ki, redaksiyamız sözügedən problemlə bağlı şəhərin müxtəlif ərazilərindən daxil olan şikayətləri işıqlandırıb.
