Sumqayıtın deputatı Elnarə Akimova məktəb dərsliklərinə ayrılan milyonlarla manatın necə xərcləndiyinə və bunun hansı nəticə verdiyinə aydınlıq gətirilməsini tələb edib.
Sumqayit24.az-ın məlumatına görə, Milli Məclisin komitələrinin birgə iclasında çıxış edən deputat dərsliklərin məzmunundakı qüsurlara, texniki çatışmazlıqlara və ictimai narazılığa diqqət çəkib.
E. Akimova bildirib ki, dərsliklərin hazırlanması və nəşri üçün dövlət büdcəsindən əhəmiyyətli vəsait ayrılsa da, ortaya çıxan problemlər mövcud nəzarət mexanizmlərinin yenidən nəzərdən keçirilməsini zəruri edir.
Deputat bu istiqamətdə xərclənən vəsaitlərlə bağlı ətraflı və şəffaf hesabatın təqdim olunmasını, dərsliklərin qiymətləndirilməsi prosesində tanınmış alimlərin, müstəqil mütəxəssislərin, ziyalıların və ictimaiyyət nümayəndələrinin real iştirakını təmin edəcək ekspertiza komissiyasının yaradılmasını təklif edib.
O, həmçinin Milli Məclisdə Elm və Təhsil Nazirliyinin, aidiyyəti dövlət qurumlarının, mütəxəssislərin və ictimaiyyət nümayəndələrinin iştirakı ilə dərsliklərin keyfiyyətinə dair mütəmadi dinləmələrin keçirilməsini vacib sayıb.
