Azərbaycanda deputatlar gələn həftə tətildən qayıdacaqlar.
Sumqayit24.az xəbər verir ki, Milli Məclisin Daxili Nizamnaməsinə əsasən, deputatların tətil müddəti yanvarın 15-dək davam edir.
Daxili Nizamnamənin birinci maddəsinə (Azərbaycan Respublikası Milli Məclisinin fəaliyyətinin əsasları) əsasən, səlahiyyəti dövründə Milli Məclis ildə iki dəfə - iyul ayının 15-dən avqust ayının 30-dək və yanvar ayının 1-dən 15-dək tətilə buraxılır. Tətil dövründə Milli Məclisin deputatları məzuniyyətdə sayılırlar. Tətil dövründə Milli Məclisin növbədənkənar sessiyası çağırıldıqda Milli Məclisin tətili növbədənkənar sessiyanın keçirildiyi müddətə dayandırılır və Milli Məclisin deputatları həmin müddətə məzuniyyətdən geri çağırılırlar.
Konstitusiyanın 88-ci maddəsinin I hissəsinin birinci abzasına uyğun olaraq Milli Məclis hər il iki növbəti yaz və payız sessiyalarına yığılır.
Qeyd edək ki, Sumqayıt üzrə deputat seçilmiş şəxslər aşağıdakılardır:
– 42 saylı Sumqayıt birinci Seçki Dairəsi — Hüseynova Hicran Kamran qızı;
– 43 saylı Sumqayıt ikinci Seçki Dairəsi — Mirkişili Tahir Famil oğlu;
– 44 saylı Sumqayıt üçüncü Seçki Dairəsi — Vəliyeva Mehriban Hidayət qızı;
– 45 saylı Sumqayıt dördüncü Seçki Dairəsi — Salmanova Səbinə Qədir qızı;
– 46 saylı Sumqayıt beşinci Seçki Dairəsi — Akimova Elnarə Seydulla qızı;
– 47 saylı Sumqayıt-Abşeron-Qaradağ Seçki Dairəsi — Şükürov Zaur Ramiz oğlu.
