Sumqayıt cüdoçuları yarışda yüksək nəticə göstəriblər.
Sumqayit24.az xəbər verir ki, cüdo üzrə U-17 yeniyetmələr arasında Liqa yarışının III turu başa çatıb.
Abşeron Olimpiya İdman Kompleksində keçirilən turnirin son günündə 5 çəkidə 154 cüdoçu qüvvəsini sınayıb. Qızlar -48 kq, -63 kq; oğlanlar isə -60 kq, -81 kq, +90 kq çəki dərəcələrində mübarizə aparıb.
Yarışda ümumilikdə 83 klub və idman cəmiyyətindən 548 cüdoçu (433 oğlan, 115 qız) iştirak edib.
Qızlar arasında keçirilən yarışlarda -48 kq çəki dərəcəsində mübarizə aparan sumqayıtlı Fatimə Fərmanzadə (RKİM) bütün rəqiblərini geridə qoyaraq qızıl medal qazanıb. Eyni çəki dərəcəsində Fatimə Muradlı (Sumqayıt şəhəri 2 nömrəli UGİŞM) isə 3-cü yerə layiq görülərək bürünc medal əldə edib.
57 kq çəki dərəcəsində çıxış edən Yağmur Əhmədzadə ("Neftçi" Sumqayıt) 3-cü yerə layiq görülərək bürünc medal əldə edib.
-63 kq çəki dərəcəsində çıxış edən Səma Vəlizadə ("Neftçi" Sumqayıt) ikinci yerə layiq görülüb.
Oğlanların yarışında isə -60 kq çəki dərəcəsində İlham Əlizadə (Sumqayıt şəhəri 1 nömrəli İOEUGİŞM) 1-ci yerin, Əli Əlizadə (Sumqayıt şəhəri 1 nömrəli İOEUGİŞM) isə 3-cü yerin sahibi olub.
