Bu gün sumqayıtlı şəhidlərimizin doğum günüdür.
Ruslan Rəcəbov 1984-cü il avqustun 1-də Sumqayıt şəhərində anadan olub. Evli idi, 2 övladı yadigar qalıb.
Azərbaycan Ordusunun Hərbi Dəniz Qüvvələrinin miçmanı olan Ruslan Rəcəbov 2020-ci il sentyabrın 27-də başlanan Vətən müharibəsi zamanı Cəbrayılın, Füzulinin, Qubadlının və Xocavəndin azadlığı uğrunda gedən döyüşlərdə savaşıb. Oktyabrın 31-də Xocavənd döyüşləri zamanı şəhid olub. Bakı şəhəri II Şəhidlər Xiyabanında dəfn olunub.
Prezident İlham Əliyevin Sərəncamlarına əsasən Ruslan Rəcəbov ölümündən sonra "Qarabağ" ordeni, "Vətən uğrunda", "Cəbrayılın azad olunmasına görə", "Xocavəndin azad olunmasına görə", "Füzulinin azad olunmasına görə", "Qubadlının azad olunmasına görə" medalları ilə təltif edilib.
***
Emil Əliyev 1993-cü il avqustun 1-i Sumqayıt şəhərində anadan olub. 2000-2011-ci illərdə Sumqayıt şəhərində yerləşən Tofiq İsmayılov adına 29 saylı tam orta məktəbində təhsil alıb. Həmin ildə Azərbaycan Dövlət Aqrar Universitetinin Energetika fakültəsinə daxil olub. Subay idi.
2016-cı ildə Aprel döyüşlərində iştirak edib və böyük şücaət göstərib.
2020-ci il sentyabrın 27-də başlanan Vətən müharibəsində könüllü iştirak edib. Müxtəlif istiqamətlərdə döyüşlərə qatılan Emil Əliyev ən son 6 oktyabr 2020-ci il tarixində Füzuli rayonu uğrunda gedən döyüşlərdə qəhrəmanlıq göstərərək şəhidlik zirvəsinə ucalıb. Emil Əliyev Sumqayıt Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, Emil Əliyev ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə" medalları, 3-cü dərəcəli "Vətənə xidmətə görə" ordeni ilə təltif edilib.
