Volqa–Xəzər dəniz naviqasiya kanalının (VXMŞK) dərinləşdirilməsi işləri dayazlaşma və qurunun sahəsinin genişlənməsi ilə birlikdə Volqa axınının Şimal Xəzərin şərqində yerləşən hissələrdən kənar keçərək birbaşa Orta Xəzərə yönəlməsinə səbəb olur.
Bundan əlavə, qlobal logistika marşrutlarının inkişafı yad canlı növlərinin Xəzər dənizi hövzəsinə intensiv şəkildə daxil olmasına şərait yaradır.
Bu barədə TASS-a Xəzər Elmi-Tədqiqat Balıqçılıq İnstitutunun Volqa–Xəzər filialından məlumat verilib.
Xəzər dənizi tədqiqatçılar tərəfindən şərti olaraq üç hissəyə bölünür və bu hissələr hidroloji–hidrokimyəvi rejimlərinə görə fərqlənir. Bioloji məhsuldarlığa görə ən böyük əhəmiyyət Şimal Xəzərə məxsusdur, ilk növbədə də Volqa çayının əhəmiyyətli axını hesabına.
“Dənizin geri çəkilməsi, qurunun irəliləməsi, həmçinin Volqa–Xəzər dəniz naviqasiya kanalının dərinləşdirilməsi işləri Volqa axınının getdikcə daha çox birbaşa Orta Xəzərə yönəlməsinə, bununla da Şimal Xəzərin şərqində yerləşən akvatoriyalara faydalı təsirini istisna etməsinə səbəb olur.
Dəniz səviyyəsinin dayazlaşması amili iqlimin dəyişkənliyi, Xəzər sularının isinməsi və duzluluğunun artması ilə birlikdə, qlobal logistika marşrutlarının inkişafı və bəzi biznes sahələrinin genişlənməsi fonunda yad canlı növlərinin Xəzər dənizi hövzəsinə intensiv şəkildə daxil olmasına gətirib çıxarır”, – deyə filialdan bildirilib.
