Sumqayıt Apellyasiya Məhkəməsində on dörd yaşına çatmış, lakin on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmədə təqsirləndirilən Malik Babayevin (adı, soyadı şərtidir) barəsindəki hökmdən verilən apellyasiya şikayətinə baxılıb.
Pravda.az-ın əldə etdiyi məlumata görə, hakim Elman Əhmədovun sədrliyi ilə keçirilən prosesdə qərar elan olunub.
Məhkəmənin qərarına əsasən, apellyasiya şikayəti təmin edilməyib.
İttihama görə, 2002-ci il təvəllüdlü Malik Babayev 2023-cü ilin dekabr ayında 2009-cu il təvəllüdlü zərərçəkmiş L.L. (adı, soyadı şərtidir) ilə tanış olub və aralarında yaranmış münasibətdən sui-istifadə edib. O, 2024-cü ilin aprel-iyul ayları ərzində Bakı- Quba avtomagistral yolunun Sumqayıt şəhəri Ceyranbatan qəsəbəsi ərazisindən keçən hissəsində yerləşən “Praqa” hoteldə və Sumqayıt şəhərində yaşadığı fərdi evdə on altı yaşına çatmayan qıza qarşı seksual xarakterli hərəkətlər edib.
Sumqayıt Şəhər Məhkəməsinin hökmü ilə Malik Babayev 1 il 5 ay 28 gün müddətə azadlıqdan məhrum edilib.
