Sumqayıt Şəhər İcra Hakimiyyətinin başçıs Zakir Fərəcov elektrik avtobusu istehsal edən zavodda olub.
Sumqayit24.az xəbər verir ki, sözügedən “Azerbaijan Energy Automotive Factory” MMC Sumqayıt Sənaye Parkında fəaliyyət göstərir. Ziyarət zamanı icra başçısına bildirilib ki, müəssisə tərəfindən artıq ilk elektrik avtobusu istehsal edilib və bu avtobus “BakuBus” MMC-yə təqdim olunub. Zavodda istehsal edilən avtobuslar ekoloji baxımdan təmiz, enerjiyə qənaətcil və müasir texnoloji standartlara cavab verir.
Məlumat verilib ki, “Azerbaijan Energy Automotive Factory” Sumqayıt Sənaye Parkının rezidenti kimi fəaliyyət göstərir və layihə Azərbaycanın yaşıl enerji və yaşıl nəqliyyat siyasətinin tərkib hissəsidir. Müəssisə Çinin “BYD Company Limited” şirkəti və “SARDA Group”un birgə təşəbbüsü ilə yaradılıb.
Zakir Fərəcov müəssisədə yaradılan şərait, tətbiq edilən müasir texnologiyalar və istehsal potensialı ilə maraqlanıb, mühəndis və texniki heyətlə söhbətlər aparıb. O bildirib ki, belə layihələr Sumqayıtın sənaye potensialının artmasına, innovativ və ekoloji yönümlü istehsalın genişlənməsinə, eləcə də yeni iş yerlərinin açılmasına xidmət edir.
Qeyd olunub ki, yaxın dövrdə müəssisədə elektrik avtobuslarının müxtəlif modelləri ilə yanaşı, yük və kommunal nəqliyyat vasitələrinin də istehsalı planlaşdırılır.
Bu təşəbbüs, həmçinin Azərbaycan-Çin əməkdaşlığının uğurlu nəticələrindən biri kimi ölkəmizin regionda ekoloji təmiz və dayanıqlı nəqliyyat sahəsində mövqeyini daha da möhkəmləndirəcək.
