Sumqayıt Şəhər İcra Hakimiyyətinin başçısı Zakir Fərəcov Çin Xalq Respublikasının 12 əyalətini təmsil edən 20 şirkətin nümayəndələrini qəbul edib. Görüşdə əsasən özəl sektora aid investorlar iştirak ediblər.
Sumqayit24.az xəbər verir ki, Zakir Fərəcov Sumqayıtın Cənubi Qafqazın ikinci böyük sənaye mərkəzi olaraq geniş iqtisadi potensiala malik olduğunu bildirib. Şəhərdə son illər ərzində sənaye müəssisələrinin modernləşdirilməsi, ixracyönümlü məhsullar istehsal edən sənaye parklarının yaradılması istiqamətində mühüm addımlar atılıb. Şəhər rəhbəri həmçinin vurğulayıb ki, Sumqayıt ilə Çinin Sian, Mian və Çun Çin şəhərləri arasında qardaşlıq münasibətləri mövcuddur və bu əlaqələr çərçivəsində sənaye, təhsil və mədəniyyət sahələrində bir sıra birgə layihələr həyata keçirilib.
Çin Xarici İnkişaf Assosiasiyasının prezidenti He Çjenveyi səmimi qəbul üçün təşəkkürünü bildirib və qeyd edib ki, bu səfər investorların Sumqayıtın iqtisadi potensialı ilə yaxından tanış olması baxımından mühüm əhəmiyyət daşıyır. O, Çin şirkətlərinin Azərbaycanda, xüsusilə də Sumqayıtda birgə layihələrə maraqlı olduqlarını vurğulayıb.
He Çjenveyi bildirib ki, əməkdaşlıq üçün üç əsas istiqamət ön plana çəkilir. Bunlara Çindən Avropaya Qazaxıstan və Bakı vasitəsilə istifadə olunacaq nəqliyyat və logistika marşrutları, Azərbaycanda günəş və külək layihələrinin inkişafı üzrə bərpa olunan enerji sektoru, eləcə də avtomobil sənayesi, binalar və idarəetmə sistemlərini əhatə edən “ağıllı texnologiyalar”la bağlı intellektual istehsal daxildir.
Qeyd olunub ki, bu əlaqələr yeni investisiyaların cəlb olunmasına təkan verəcək, müəssisələrə yaradılan güzəştli iş şəraiti onları daha da həvəsləndirir. İştirakçı şirkətlərin nümayəndələri də Sumqayıtda fəaliyyətə başlamaqda maraqlı olduqlarını ifadə ediblər. Vurğulanıb ki, yaxın gələcəkdə şəhərdə Çin müəssisələrinin sayı daha da artacaq.
Görüş müzakirə şəraitində keçib, iştirakçılar investisiya imkanları ilə bağlı suallarını ünvanlayıb və onları maraqlandıran məsələlərə ətraflı cavablar verilib.
