28 may 1918-ci ildə ictimai-siyasi xadim Həsən bəy Ağayevin sədrliyi ilə Azərbaycan Milli Şurasının tarixi iclası keçirildi. Tiflisdə keçirilən həmin iclasda 6 maddədən ibarət İstiqlal Bəyannaməsi qəbul edildi. Milli Şuranın üzvləri: Məhəmməd Əmin Rəsulzadə, Fətəli xan Xoyski, Nəsib bəy Yusifbəyli, Əlimərdan bəy Topçubaşov, Camo bəy Hacınski, Səməd bəy Mehmandarov, Xudadat bəy Rəfibəyli, Əliağa Şıxlinski və digər ziyalıların imzaladıqları Dövlət müstəqilliyi haqqında Bəyannamə ilə türk-müsəlman dünyasında ilk parlamentli respublikanın – Azərbaycan Xalq Cümhuriyyətinin əsası qoyuldu. Dövrün mürəkkəb ictimai-siyasi şəraitinə baxmayaraq, təməli qoyulan bu Respublika hazırkı müstəqil Azərbaycan Respublikasının sələfidir.
1918-1920-ci illərdə, 23 ay ərzində mövcud olan AXC-nin dövründə dövlət aparatı təşkil edildi, ölkənin sərhədləri müəyyənləşdirildi, ordu quruculuğu sahəsində ciddi tədbirlər həyata keçirildi, dövlət atributları yaradıldı. Azərbaycan dili dövlət dili elan edildi. Təhsil sahəsində də mühüm addımlar atıldı: Azərbaycanın ilk universiteti təsis olunaraq təhsil milliləşdirildi.
Müstəqil Azərbaycan dövründə AXC-nin yarandığı 28 May “Respublika Günü” adı ilə milli bayram kimi qeyd edilməyə başladı. 2021-ci ildə bayramın adı dəyişdirilərək “Müstəqillik Günü” oldu.
