Bu gün sumqayıtlı şəhidlərimizin doğum günüdür.
Elnur Əli oğlu Allahverdizadə 1995-ci il mayın 15-də Sumqayıt şəhərində anadan olub. Əslən Zəngilan rayonundandır.
Azərbaycan Ordusunun əsgəri olan Elnur Allahverdizadə 2020-ci il sentyabrın 27-də başlanan Vətən müharibəsində könüllü topçu olaraq iştirak edib. Ağdamın və Xocavəndin azadlığı uğrunda gedən döyüşlərdə vuruşub. 7 noyabr 2020-ci ildə Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zamanı şəhid olub. 8 noyabr 2020-ci ildə Sumqayıt Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, Elnur Allahverdizadə ölümündən sonra "Vətən uğrunda", "Cəsur döyüşçü", "Xocavəndin azad olunmasına görə" medalları ilə təltif edilib.
***
Tərlan Fətullayev 1989-cu il mayın 15-də Sumqayıt şəhərində anadan olub.
Azərbaycan Ordusunun əsgəri olan Tərlan Fətullayev 2020-ci il sentyabrın 27-də başlanan Vətən müharibəsi zamanı Cəbrayılın azadlığı uğrunda gedən döyüşlərdə savaşıb. Oktyabrın 25-də Cəbrayıl döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, Tərlan Fətullayev ölümündən sonra "Vətən uğrunda", "Cəbrayılın azad olunmasına görə", "Laçının azad olunmasına görə", "Füzulinin azad olunmasına görə" medalları ilə təltif edilib.
***
Rövşən Təhməzov 15 may 1997-ci ildə Sumqayıt şəhərində anadan olub.
Rövşən Təhməzov 2020-ci il sentyabrın 27-də başlanan Vətən müharibəsində könüllü iştirak edib və torpaqlarımızın işğaldan azad olunmasında igidlik göstərərək qəhrəmancasına şəhid olub.
Prezident İlham Əliyevin Sərəncamlarına əsasən, Rövşən Təhməzov ölümündən sonra "Vətən uğrunda", "Füzulinin azad olunmasına görə" medalları ilə təltif edilib.
