Sumqayıtda “Arzu” mərasim evində yoxlama keçirilib.
Sumqayıt24.az xəbər verir ki, bu barədə Fövqəladə Hallar Nazirliyi (FHN) məlumat yayıb.
Dövlət Yanğın Nəzarəti Xidməti tərəfindən keçirilən reyd zamanı şəhərin 10-cu mikrorayon, Koroğlu küçəsi, 1 ünvanında yerləşən obyektdə çoxsaylı nöqsanlar aşkarlanıb. Həmin nöqsanların insan həyatı və ya sağlamlığına təhlükə yaratdığı müəyyən edilib:
- obyektdə avtomatik yanğınxəbərverici siqnalizasiya qurğusu quraşdırılmayıb;
- elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb;
- obyektdə yanğın su hovuzu mövcud deyil;
- obyekt tikinti norma və qaydalarının tələblərinə uyğun ehtiyat təxliyə çıxışı ilə təmin olunmayıb;
- obyekt ilkin yanğınsöndürmə vasitələri, o cümlədən odsöndürən balonlarla təmin olunmayıb;
- təxliyə planı mövcud deyil;
- obyektin tavan hissələri yanar material olan lambirlə üzlənilib.
Yanğın təhlükəsizliyi norma və qaydalarının tələblərinin kobud pozulması faktları aşkar edilən mərasim evinin fəaliyyətinin dayandırılması qərarı verilib.
