Azərbaycanda sektorlar üzrə minimum əməkhaqqının müəyyənləşməsi təklif olunur.
Sumqayit24.az xəbər verir ki, bu təşəbbüslə Milli Məclisin Əmək və sosial siyasət komitəsinin üzvü, deputat Vüqar Bayramov bugünkü iclasda çıxış edib.
O bildirib ki, bəzi sektorlarda maaşlar kifayət qədər yüksəkdir:
"Həmin sahələrdə minimum əməkhaqqının ölkə üzrə eyni səviyyədə müəyyənləşdirilməsi maaş ödənişlərinə təsir göstərir. Əslində, minimum əməkhaqqı ilə bağlı meyarlar təsdiqlənib. Bəzi sektorlarda bunu etmək mümkündür. Məsələn, neft sektorunda daha yüksək əməkhaqqını müəyyən edə bilərik. Bunun ayrıca araşdırmağa ehtiyac var. Sahəvi həddi müəyyənləşdirmək ölkə üzrə orta minimum əməkhaqqına təsir göstərə bilər. Sektor üzrə məbləğ yüksəkdirsə, ortalama göstərici da artacaq. Təklif edərdim bu məsələyə baxaq".
Parlamentin Əmək və sosial siyasət komitəsinin sədri Musa Quliyev isə cavab olaraq bildirib ki, hökumətdə dövlət büdcəsindən maliyyələşdirilən sahələrdə çalışanların maaşlarının yeni Vahid Tarif Cədvəlinə əsasən müəyyən edilməsi ilə bağlı işlər aparılır.
O əlavə edib ki, yeni versiya təsdiqləndikdən sonra sözügedən məsələyə baxmaq olar.
