Sumqayıt təkcə sənaye şəhəri deyil. Burada çoxlarının xəbərsiz olduğu maraqlı təbiət guşələrindən biri də Sumqayıt kanyonudur.
Şəhər ərazisində, Sumqayıtçayın aşağı axarında, Qaraboğaz düzənliyində yerləşən bu təbiət abidəsi qeyri-adi relyefi ilə diqqət çəkir. Ərazidən asılı olaraq kanyonun hündürlüyü 10 metrdən artıq, eni isə onlarla metrə çatır.
Kanyon yarımsəhra landşaftına malikdir. Burada yovşan və yulğun kimi bitkilər bitir, canavar, tülkü, çaqqal, dovşan, Xəzər gekkonu və müxtəlif quş növlərinə rast gəlinir.
Mütəxəssislərin fikrincə, Sumqayıt kanyonu ekoturizm baxımından böyük potensiala malikdir. Lakin ərazidə məişət tullantılarının olması və antisanitar vəziyyət onun cəlbediciliyini azaldır.
