Günəşin görünən hissəsində bir neçə iri protuberans müşahidə olunub.
Bu barədə Rusiya Elmlər Akademiyasının Kosmik Tədqiqatlar İnstitutu yanında fəaliyyət göstərən Günəş Astronomiyası Laboratoriyası özünün "Telegram" kanalında məlumat yayıb.
Məlumatda qeyd olunur ki, Günəşin səthində iri ölçülü protuberanslar – tünd rəngli liflər qeydə alınıb. Bildirilir ki, bu liflərin hər biri əslində soyuq hidrogen kütləsindən ibarət sıx və nəhəng buludlardır. Adətən belə iri protuberanslar Günəşdən ayrılaraq yüksək sürətlə açıq kosmosa doğru hərəkət edir.
Alimlərin sözlərinə görə, belə atılmaların dəqiq nə vaxt baş verəcəyini əvvəlcədən müəyyənləşdirmək olduqca çətindir. Bununla belə, hazırkı müşahidələr göstərir ki, onların hərəkət trayektoriyası planetlərlə toqquşma ehtimalını demək olar ki, istisna edir. Başqa sözlə, həmin buludların Yerə təsir göstərməsi gözlənilmir.
Günəşdə müşahidə olunan digər aktivliklərə gəldikdə isə, hazırda görünən ləkə qrupları və fəal zonalar nisbətən zəif hesab olunur. Buna baxmayaraq, onların daxilində toplanmış enerji müəyyən şəraitdə "M" sinifli alışmaların baş verməsinə səbəb ola bilər.
Eyni zamanda bildirilir ki, qarşıdakı həftə ərzində geomaqnit vəziyyətinin sabit qalacağı proqnozlaşdırılır. Yaxın günlər üçün geomaqnit aktivliyi "yaşıl", yəni təhlükəsiz səviyyədə qiymətləndirilir.
