Növbəti tədris ilindən məktəb avtobuslarının fəaliyyətə başlaması planlaşdırılır.
Bu haqda elm və təhsil naziri Emin Əmrullayev jurnalistlərə açıqlamasında deyib.
Nazir bildirib ki, hazırda layihə əsasən nəqliyyatın sıx olduğu ərazilərdə yerləşən məktəblərdə sınaqdan keçirilir.
Qeyd edək ki, Prezident İlham Əliyevin sərəncamı ilə təsdiqlənən “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nda öz əksini tapan “Məktəbli avtobusları” layihəsinin artıq növbəti tədris ilindən həyata keçirilməsi planlaşdırılır.
Bəs, görəsən, ümumiyyətlə məktəbli avtobusları nə vəd edir? Bu, təhsilə nə kimi təsir edəcək?
Mövzu ilə bağlı Bakuplus.az-a açıqlama verən Milli Məclisin deputatı Ceyhun Məmmədovun sözlərinə görə, məktəb avtobuslarının olması çox yaxşı bir təcrübədir:
“Dünya ölkələrinin çoxunda belə bir layihələr var. Bu, yaxşı ənənədir. Bizdə də bunun tətbiqinə ehtiyac var. Amma bu, böyük bir vəsaiti tələb edən məsələdir. Düşünürəm ki, biz bu problemi həll etməliyik.
Bu gün şəhərdə sıxlığı yaradan əsas faktorlardan biri valideynlər tərəfindən uşaqların məktəblərə daşınmasıdır. Məktəblər bağlı olanda biz bunu aydın görürük və hiss edirik. Ona görə də bu istiqamətdə müəyyən addımların atılması məqsədəuyğundur. Bu həm valideynlərin işini, həm də nəqliyyat sıxlığını azaldacaq. İzdihamın və gərginliyin də qarşısı alınacaq”.
Təhsil eksperti Elçin Süleymanov isə qeyd edib ki, bu təcrübə özəl məktəblərdə uzun müddətdir ki, tətbiq olunur:
“Bu, dünyada inkişaf etmiş ölkələrdə də tətbiq olunur. Uşaqların təhlükəsiz və tez çatması üçün, düşünürəm ki, faydalı addımdır. Valideynlər üçün də kifayət qədər faydası var. Tıxaclarda vaxt itkisi olmayacaq. Amma bunu təşkil etmək mürəkkəbdir.
Əksər ölkələrdə bu, valideynlərin dəstəyi ilə olur. Burada məktəb sadəcə təşkilatçıdır. Valideyn, müəllim və məktəb Şurası müxtəlif daşıyıcı şirkətlər ilə müqavilə bağlayır. Dünya təcrübəsində şagirdlər yaxın ərazilərə daşınır, məsafə uzaq olduqca şagirdlərin toplanması və məktəbə çatdırılması uzun çəkə bilər. Bun görə də valideynlər övladlarını yaşadıqları əraziyə ən yaxın məktəbə göndərsələr daha yaxşı olar. Məktəb avtobusunun tətbiqi həm vaxt itkisinin qarşısını alar, həm də tıxaclar azalar”.
