Sumqayıtın ən çox ziyarət olunan istirahət məkanlarından birində uşaq meydançası baxımsız vəziyyətdədir.
Söhbət Nəsimi adına Mədəniyyət və İstirahət Parkından gedir. Sumqayit24.az-a daxil olan görüntülərdən məlum olur ki, burada uşaqlar üçün quraşdırılmış ödənişsiz sürüşkən kompleksinin döşəmə hissəsindəki taxtalar qırılıb. Nəticədə iri boşluq yaranıb və uşaqlar sürüşkəndən istifadə etmək üçün həmin hissədən keçmək məcburiyyətində qalırlar.
Valideynlərin sözlərinə görə, qurğunun bu vəziyyətdə qalması hər an bədbəxt hadisəyə səbəb ola bilər. Xüsusilə axşam saatlarında və uşaqlar oyun zamanı diqqətsiz olduqda platformadakı boşluğa ayağın düşməsi ciddi xəsarətlə nəticələnə bilər.
Sakinlər aidiyyəti qurumlardan "Nəsimi" parkındakı uşaq oyun meydançasına baxış keçirilməsini, qəzalı vəziyyətdə olan hissələrin təcili təmir edilməsini və digər qurğuların da təhlükəsizlik baxımından yoxlanılmasını xahiş edirlər.
