"Xiyar və pomidorun tərkibində olan bəzi karbohidratlar və qida lifləri bəzi insanların həzm sistemində narahatlıq yarada bilər".
Bu barədə rusiyalı qastroenteroloq, tibb elmləri namizədi Yevgeni Belousov danışıb.
Ekspertin sözlərinə görə, narahatlığın əsas səbəbi tərəvəzlərin özü deyil. Problem nazik bağırsaqda tam həzm olunmayan karbohidratlar və qida liflərindən qaynaqlanır.
Həkim izah edib ki, bu maddələr yoğun bağırsağa çatdıqda qaz əmələ gətirən bakteriyalar tərəfindən parçalanır və nəticədə köp yaranır.
Həssas bağırsaq sindromundan əziyyət çəkən və ya bağırsaqları daha həssas olan insanlarda bu vəziyyət daha çox müşahidə edilir.
Gündəlik qidalanmasında tərəvəzə az yer verən şəxslər birdən-birə böyük porsiyada salat qəbul etdikdə müvəqqəti qaz və şişkinlik hiss edə bilərlər.
Onun sözlərinə görə, buna səbəb təzə tərəvəzlərin yüksək su tərkibi və həll olunmayan qida lifləridir. Adətən bu narahatlıq ciddi təhlükə yaratmır və qısa müddət ərzində öz-özünə keçir.
Bununla yanaşı, qastroenteroloq bəzi halların diqqətdən kənarda qalmamalı olduğunu vurğulayıb. Davamlı şişkinlik, şiddətli qarın ağrısı, qanama və ya səbəbsiz çəki itkisi müşahidə olunarsa, həkim müayinəsinə ehtiyac var.
Belousov həmçinin xiyar və pomidorun birlikdə yeyilməsinin zərərli olması barədə yayılmış fikrin doğru olmadığını deyib. Onun sözlərinə görə, bu iddianı təsdiqləyən etibarlı elmi sübut mövcud deyil.
Həkim qeyd edib ki, bu tərəvəzləri qəbul etdikdən sonra yaranan narahatlıq daha çox porsiyanın həcmi və insanın fərdi həzm xüsusiyyətləri ilə əlaqədardır.
Mütəxəssisin fikrincə, salata əlavə olunan soğan, kələm və paxlalılar qaz əmələ gəlməsini xiyar və pomidordan daha çox artıra bilər.
Belousov mayonez və digər yağlı sousların istifadəsini də məsləhət görmədiyini bildirib. O qeyd edib ki, belə souslar mədənin boşalma prosesini ləngidir və ağırlıq hissi yaradır. Südlü souslar isə laktoza dözümsüzlüyü olan insanlarda əlavə narahatlığa səbəb ola bilər.
Həkimin sözlərinə görə, salatlara az miqdarda bitki yağı əlavə etmək daha faydalıdır. Bu həm sağlam seçim hesab olunur, həm də orqanizmin vitaminləri daha yaxşı mənimsəməsinə kömək edir.
Mənbə: İz.ru
