Sumqayıt şəhərini Saray qəsəbəsi ilə birləşdirən yeni körpüdə tikinti işləri demək olar ki, yekunlaşıb. Lakin avtomobil yolu Saray körpüsünə uyğunlaşdırılmayıb.
Məhz bu səbəbdən həmin ərazidə tıxac və qəzalar qaçılmaz olacaq. Sumqayıtdan Abşeron istiqamətində hərəkətdə olan avtomobillər körpü üzərindəki yolun son hissəsində biabırçı bir mənzərə ilə qarşılaşır. Yol genişləndirilmədiyindən avtomobillərin bu istiqamətdə hərəkətində müəyyən problemlər yaranacaq.
Sakinlərin sözlərinə görə, bütün bunlara səbəb Saray istiqamətində olan yolun üzərində iaşə obyektinin yerləşməsidir. Onların sözlərinə görə, körpü tikilən zaman həmin obyekt yolun üzərindən götürülməli idi. Elə bunu həmin obyektin sahibi Rauf Həsənov da təsdiq edir. O deyib ki, tikinti zamanı ona söküntü ilə bağlı heç bir müraciət edilməyib. Məhz bu səbəbdən ərazidə acınacaqlı vəziyyət yaranıb.
Azərbaycan Avtomobil Yolları Dövlət Agentliyindən (AAYDA) Den.az-a bildirilib ki, körpüdə tikinti işləri layihəyə tam uyğun aparılıb. Ancaq yolun genişləndirilməsi onların səlahiyyətində deyil.
Sumqayıt şəhər İcra Hakimiyyətindən isə qeyd edilib ki, körpü istifadəyə verildikdən sonra yolun genişləndirilməsi ilə bağlı işlər görüləcək, həmçinin piyadaların və nəqliyyatın hərəkətinin asanlaşdırılması məqsədilə mövcud yol infrastrukturu körpüyə uyğunlaşdırılacaq. Bununla bağlı qərara alınıb ki, yaxın zamanlarda Məhəmməd Əsədov küçəsinin genişləndirilməsi ilə bağlı yeni layihə hazırlanaraq icrasına başlanılsın.
