Sumqayıt şəhəri Hacı Zeynalabdin qəsəbəsində yaşayan sakinlər uzun illərdir kanalizasiya probleminin həllini gözləyirlər.
Sumqayit24.az-a problem barədə "Xəzri-2" yaşayış massivinin sakinləri danışıblar.
Vətəndaşların iddiasına görə, massivdə mərkəzləşdirilmiş kanalizasiya sisteminin olmaması səbəbindən həyətlərdə şambo quyularından istifadə edilir. Quyular dolduqca xüsusi maşın sifariş etməli və bunun üçün əlavə ödəniş etməli olurlar.
Onların sözlərinə görə, yağışlı havalarda vəziyyət dözülməz olur. Belə ki, şamboların daşması nəticəsində çirkab sular həyətlərə və küçələrə yayılır, ərazidə antisanitar vəziyyət və xoşagəlməz qoxu yaranır.
Şikayətçilər bildirirlər ki, sakinlərin bir çoxu bu ərazidə təxminən 30 ildir yaşayır. Onların fikrincə, bu müddət ərzində yaşayış massivinə çevrilmiş ərazidə ailələrin hələ də fərdi şambolardan istifadə etməsi müasir yaşayış şəraitinə uyğun deyil.
Vətəndaşlar problemin müvəqqəti tədbirlərlə deyil, kanalizasiya xəttinin çəkilməsi və ərazinin mərkəzləşdirilmiş sistemə qoşulması yolu ilə həll olunmasını istəyirlər.
