Sumqayıt Dövlət Universitetində (SDU) professor-müəllim heyəti və tələbələr üçün təşkil olunan təlim və kursların yekununa həsr olunan təltifetmə mərasimi keçirilib.
Sumqayit24.az xəbər verir ki, tədbirdə çıxış edən rektoru Nurəli Yusifbəyli müəllimlərin peşəkar inkişafının və rəqəmsal səriştələrinin artırılmasının universitetin prioritet istiqamətlərindən olduğunu bildirib. O qeyd edib ki, təlimlər çərçivəsində əldə olunan bilik və bacarıqlar yeni tədris ilində tədris prosesinə tətbiq ediləcək, bu istiqamətdə fəaliyyət gələcəkdə də ardıcıl şəkildə davam etdiriləcək.
Tədbirin sonunda təlim və kursları uğurla başa vuran iştirakçılara sertifikatlar təqdim olunub. Fəal iştirakçılar isə universitet rəhbərliyi tərəfindən təşəkkürnamələrlə təltif ediliblər.
Qeyd edək ki, proqram çərçivəsində Filologiya fakültəsinin Xarici dillər kafedrası tərəfindən professor-müəllim heyəti üçün ingilis dili kursları, Riyaziyyat fakültəsinin Riyaziyyat və informatikanın tədrisi texnologiyası kafedrası tərəfindən 500 və daha yüksək bal toplamış tələbələr üçün ofis proqramları üzrə kurslar, Mühəndislik fakültəsinin İnformasiya texnologiyaları kafedrası tərəfindən isə professor-müəllim heyəti üçün "Rəqəmsal bacarıqlar" təlimləri təşkil olunub.
İngilis dili kurslarını uğurla başa vuran iştirakçıların bilik və bacarıqları ITAC Beynəlxalq Dil Mərkəzinin sertifikatlaşdırma imtahanı vasitəsilə qiymətləndirilib və müvafiq sertifikatlarla təsdiqlənib.
