Sumqayıt Apellyasiya Məhkəməsində mənimsəmədə və vəzifə səlahiyyətlərindən sui-istifadə təqsirləndirilən Eldəniz Quluzadənin (soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Elçin Məmmədovun sədrliyi ilə keçirilən prosesdə qərar elan olunub. Qərara əsasən, apellyasiya şikayəti qismən təmin edilib, Sumqayıt Ağır Cinayətlər Məhkəməsinin hökmü dəyişdirilərək təqsirləndirilən şəxsə təyin olunan 6 il müddətinə azadlıqdan məhrumetmə cəzası Cinayət Məcəlləsinin 70.1-ci maddəsi tətbiq edilməklə 2 il sınaq müddəti ilə şərti hesab edilib.
Belə ki, Eldəniz Quluzadə barəsində seçilmiş həbs qətimkan tədbiri ləğv olunub və o, Ədliyyə Nazirliyi Penitensiar Xidmətinin 3 saylı İstintaq Təcridxanasından dərhal azad edilib.
Məhkəmə tərəfindən təqsirləndirilən şəxsin üzərinə davranışına nəzarəti həyata keçirən orqana məlumat vermədən daimi yaşayış yerini dəyişməmək, habelə iş yerinin dəyişdirilməsi barədə əvvəlcədən məlumat vermək vəzifələri qoyulub. Davranışına nəzarət Sumqayıt Şəhər Probasiya Şöbəsinə həvalə edilib.
Həmçinin apellyasiya icraatı zamanı zərərçəkmiş MMC-yə 35 min manat ödənildiyi nəzərə alınaraq, ödənilməli olan maddi ziyanın məbləği 37 min 170 manat 33 qəpik məbləğində müəyyən edilib. Hökmün qalan hissəsi dəyişdirilmədən saxlanılıb.
İttihama görə, Eldəniz Quluzadə qida və qeyri-qida məhsullarının pərakəndə satışı üzrə sahibkarlıq fəaliyyəti göstərən şirkətlərdən birində Satış Departamentinin Hasilat şöbəsinin Bakı pərakəndə hasilat bölməsinin hasilatçısı vəzifəsində işləyib. O, çalışdığı 2017-2019-u illərdə Xaçmaz rayonu ərazisində fəaliyyət göstərən 53 satış nöqtəsindən təhvil aldığı ümumilikdə 174 69,79 manat məbləğində pul vəsaitindən 117 170,33 manat məbləğində pulu şirkətin sözügedən rayonda yerləşən ofisindəki xəzinəsinə təhvil verməyib və mənimsəyib.
Sumqayıt Ağır Cinayətlər Məhkəməsinin hökmü ilə Eldəniz Quluzadə 6 il müddətinə azadlıqdan məhrum edilib məhkəmə iclas zalından həbs olunmuşdu.
