"Turan Tovuz" futbol klubu Misli Premyer Liqasının IV turunda "Sumqayıt"la keçirəcəyi oyunun biletlərini satışa çıxardığını açıqlayıb.
Sumqayit24.az xəbər verir ki, Qərb təmsilçisinin bununla bağlı Feysbuk səhifəsində etdiyi paylaşım azarkeşlərin etirazına səbəb olub.
Bölgə klubunun fanatları şərh bölümündə həm bilet qiymətləri, həm də komandanın son nəticələri ilə bağlı narazılıqlarını ifadə ediblər.
Tərəfdarlardan biri 8-10 yaşlı uşaqlardan da bilet tələb olunmasını vicdansızlıq adlandırıb. Yavər Babayev adlı azarkeş isə bu məsələ ilə bağlı iradını klub prezidenti Ehtiram Quliyevə çatdıracağını bildirib.
Şərhlərdə komandanın çıxışı ilə bağlı narazılıqlar da diqqət çəkib. Bəzi azarkeşlər baş məşqçi Kurban Berdiyevi istefaya səsləyiblər. Tərəfdarlar "Turan Tovuz"un mövsümün ilk üç oyununda qol vura bilməməsini qəbuledilməz hal kimi qiymətləndiriblər.
Beləliklə, "Sumqayıt"la oyun ərəfəsində Qərb təmsilçisində azarkeşlərin narazılığı da açıq şəkildə özünü göstərməyə başlayıb.
Qeyd edək ki, "Turan Tovuz" - "Sumqayıt" oyunu sabah keçiriləcək.
