"Sumqayıt" klubunun əcnəbi futbolçularına şəhər və sumqayıtlılar haqqında suallar verdik.
Sumqayit24.az legionerlərdən Sumqayıtı necə tanıdıqlarını, şəhər və sakinləri haqqında hansı təəssüratlarının yarandığını, həmçinin yerli mətbəxdən hansı yeməkləri bəyəndiklərini soruşub.
Cavablar isə maraqlı olub.
Pakistan millisinin üzvü, "Sumqayıt"ın müdafiəçisi İsa Suliman şəhər sakinlərini üç sözlə qonaqpərvər, dözümlü və sadə kimi xarakterizə edib.
O bildirib ki, Sumqayıta gəldiyi ilk gündən insanların səmimi və yardımsevər münasibətini hiss edib:
"Mən başqa ölkədən və fərqli mədəniyyətdən gələn biri kimi insanların həqiqətən mehriban və kömək etməyə hazır olduğunu hiss etdim. Sumqayıtın güclü zəhmətkeş xarakteri var. Burada insanların çalışqan və şəhərləri ilə qürur duyduqlarını hiss etmək mümkündür. Ən çox diqqətimi çəkən isə insanların sadəliyi və səmimiyyəti oldu. Heç kim sizə özünü göstərməyə çalışmır, əksinə, sizi özlərindən biri kimi qəbul edirlər".
İsa Sulimanın diqqətini çəkən məqamlardan biri isə çay süfrələri olub:
"Hamı çay içməyi sevir. Mən də bunu xoşlayıram. Məşqlərdən sonra komanda yoldaşlarım ilə oturub çay içmək və söhbətləşmək xoşuma gəlir".
Serbiyalı yarımmüdafiəçi Aleksa Yankoviç isə Sumqayıt sakinlərini yardımsevər, mehriban və təvazökar adlandırıb.
"Mənə görə, Sumqayıt sakinlərini üç sözlə təsvir etsək, bunlar yardımsevər, mehriban və təvazökar olar. Nəyə ehtiyacım olsa və ya bilmədiyim bir şey haqqında soruşsam, insanlar mənə kömək etməyə və izah etməyə hazırdırlar. Onlar ünsiyyətcildirlər və burada asanlıqla yaxşı dostluqlar qurmaq mümkündür. Həm də çox təvazökardırlar. Bunu necə izah edəcəyimi bilmirəm, amma ümumilikdə Azərbaycan insanları haqqında təəssüratım belədir".
Aleksa yerli yeməklərdən ən çox qutabı bəyəndiyini deyib. O, həmçinin Azərbaycanda futbola və "Sumqayıt"a olan marağın gözlədiyindən daha böyük olduğunu vurğulayıb:
"Burada çoxlu yeməklərin dadına baxmışam, amma deyərdim ki, ən çox qutabı bəyəndim. Həmçinin bilmirdim ki, burada futbola bu qədər maraq var və "Sumqayıt"ı sevən bu qədər azarkeş mövcuddur. Bu, məni təəccübləndirdi və mən bunu çox sevirəm".
Ukraynada doğulan, əslən azərbaycanlı olan Emil Mustafayev isə Sumqayıt sakinlərini mehriban, qonaqpərvər və sadə adlandırıb.
"Sumqayıtı və onun sakinlərini üç sözlə təsvir etsəm, bunlar mehriban, qonaqpərvər və sadə olardı. İnsanlar burada çox səmimidirlər, bir-birlərinə kömək etməyə çalışırlar. Əgər Sumqayıta ilk dəfə gəlmisənsə, əmin ola bilərsən ki, ac qalmayacaqsan. Səni mütləq süfrəyə dəvət edib qonaq edəcəklər. Burada insanlar əlavə pafosdan uzaqdır, bir-birlərinə hörmət edir və səninlə rahat ünsiyyət qururlar".
Emil yerli mətbəxdən konkret bir yemək seçməsə də, Azərbaycanı dadlı ət və kababla əlaqələndirdiyini deyib.
Braziliyalı yarımmüdafiəçi Lukas Blek isə sumqayıtlıları qonaqpərvər, mehriban və ölkəsinə bağlı insanlar kimi təsvir edib:
"Buradakı insanlar qonaqları çox yaxşı qarşılayırlar. Həmçinin çox nəzakətli və ölkələrinə bağlıdırlar. Bu da şəhərə və ölkəyə uyğunlaşmağımı xeyli asanlaşdırır".
Cəmi bir ay əvvəl Sumqayıta gəldiyini deyən Lukası yerli mətbəxdə ən çox çörəklərin fərqliliyi təəccübləndirib:
"Sumqayıta düz bir ay əvvəl gəlmişəm. Burada əsas diqqətimi çəkən məqamlardan biri çörəklərin Braziliyadakından fərqli olmasıdır. İnsanların çörəyə çox üstünlük verdiyini də hiss etmişəm".
Komandanın braziliyalı hücumçusu Jeam Oliveira isə Sumqayıtı gözəl şəhər, sakinlərini isə çox isti və mehriban insanlar kimi xarakterizə edib.
"Sumqayıt çox gözəl şəhərdir, sakinləri isə çox istiqanlıdır. Getdiyimiz yerlərdə bizi çox yaxşı qarşılayırlar. Hər gün uşaqlar bizi görəndə çox sevinirlər. Bu, mənim diqqətimi xüsusilə çəkdi. Belə qarşılanmalardan çox xoşum gəlir".
Jeam üçün Azərbaycandakı yemək vərdişlərindən biri də maraqlı olub:
"Məni təəccübləndirən odur ki, burada demək olar, bütün yeməklərin yanında şokolad, çörək və bəzən də çay olur. Bu, Braziliyada o qədər də adi deyil. Ona görə də mənə bir az təəccüblü görünsə də, xoşuma gəldi".
