Binəqədi rayonunda Moskva prospektinin kənar yolunun, yəni Biləcəri enişi hissəsinin təmir işləri ilə əlaqədar sentyabrın 4-ü axşam saat 20:00-dan etibarən nəqliyyatın hərəkəti üçün tam bağlanacağı açıqlanıb. Məhdudiyyətin təmir işləri başa çatanadək davam edəcəyi bildirilir. Sözügedən yolun bağlanmasının xüsusilə pik saatlarda nəqliyyat sıxlığına təsir göstərə biləcəyi gözlənilir.
Biləcəri enişinin tam bağlanması Bakı yollarında nəqliyyat sıxlığına nə dərəcədə təsir göstərə bilər? "Şamaxinka" istiqamətində yaranan tıxacların qarşısını almaq üçün sürücülərə və aidiyyəti qurumlara hansı alternativ hərəkət istiqamətləri və tədbirlər tövsiyə oluna bilər?
Nəqliyyat eksperti Aslan Əsədov məsələ ilə bağlı bildirib ki, həmin ərazi hərəkətin təşkilində ən ağır küçə və prospektlərdən biridir:
"Moskva prospekti və Bakı-Sumqayıt şosesinin kəsişdiyi ərazi mürəkkəb nəqliyyat infrastrukturuna malikdir və şəhərin ən gərgin hərəkət istiqamətidir. Bu səbəbdən həmin eniş hissəsinin təmir olunması digər küçə və prospektlərdəki sıxlığa müsbət təsir göstərəcək. Başqa sözlə, bu addım şəhərdə tıxacın aradan qaldırılması üçün en vacib şərtlərdən biridir. Ona görə də həmin küçədə, həmin adı çəkilən ərazidə daha tez, gücləndirilmiş iş qrafiki ilə çalışmağa zərurət var, ehtiyac var. Belə olarsa, bəli, təmir şərtləri və təmir yaxşı ola bilər, vaxtında bitə bilər. Vaxtından əvvəl, planlaşdırılan müddətdən öncə də bunu təşkil etmək ən vacib elementdir. Ona görə də məsələnin bu kimi həll yoluna mütləq baxılmalı, ən qısa müddətdə tıxaca səbəb ola biləcək təmiri başa çatdırmaq, gücləndirilmiş iş rejimində sonlandırmaq vacibdir".
O qeyd edib ki, məktəb mövsümü ilə bağlı bütün şəhərin infrastrukturunda bu və digər formada təmir işlərini sonlandırmaq və yaxud da təxirə salmaq zəruridir:
"Hal-hazırda metroda olan, metronun özünün yenidən qurulma və təmir işlərinə görə kifayət qədər sıxlıq olduğu üçün bu məsələləri müəyyən dərəcədə təxirə salmaq vacibdir".
Mənbə: Redaktor.аz
