Bu gün, 10 dekabr saat 16:00-da Bakıda sumqayıtlı şəhid Elnur Allahverdizadənin “25” adlı fotosərgisi keçiriləcək. Xətai Sənət Mərkəzində baş tutacaq sərgidə şəhidin 25 yaşına 25 “street” janrında çəkdiyi fotolar nümayiş olunacaq.
Elnur Allahverdizadə 1995-ci ildə Sumqayıt şəhərində anadan olmuşdur. O, “Barama" və "Atılmışlar”, “Buğlama" serialları, bir çox reklam çarxlarının səs rejissoru olmuşdur. Xüsusilə də, "Son iclas" bədii filminin bum operatoru olub.
Elnur Allahverdizadə 7 noyabr 2020-ci ildə Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zamanı şəhid olmuşdur və 8 noyabr tarixində Sumqayıt Şəhidlər Xiyabanında dəfn olunmuşdur. Allahverdizadə “Vətən uğrunda”, “Xocavəndin azad olunmasına görə” və "Cəsur döyüşçü" medalları ilə təltif edilib.
Sərginin keçirəcəyi ünvan: Bakı şəhəri, Xocalı prospekti 62, Xətai Sənət Mərkəzi.
