Sumqayıtda təhsil ocağı 11-ci sinif şagirdlərinin buraxılış imtahanında İngilis dili fənni üzrə yüksək nəticə göstərən məktəbləri arasında ilk sıradadır.
Bu barədə 2025-ci ilə aid tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların yer aldığı "Abituriyent" jurnalının 12-ci nömrəsində məlumat verilib.
Orta bal göstəricisinə əsasən, ilk yeri Sumqayıt şəhəri Təbiət elmləri təmayüllü gimnaziyası tutub. Məktəbin 62 məzunu buraxılış imtahanında iştirak edib və onların orta bal göstəricisi 94,57 faiz təşkil edib.
Bundan əlavə, Sumqayıt şəhəri Texniki və təbiət elmləri liseyi və Sumqayıt şəhəri "İstedad" liseyi də ingilis dili fənni üzrə yüksək nəticə göstərən məktəbləri arasında yer alır.
Belə ki, Sumqayıt şəhəri Texniki və təbiət elmləri liseyində buraxılış imtahanında iştirak edən 40 şagirdin orta bal göstəricisi 87,98 faiz olub. Sumqayıt şəhəri "İstedad" liseyində isə buraxılış imtahanında iştirak edən 61 şagirdin orta bal göstəricisi 83,87 faiz təşkil edib.
Məlumat üçün bildirək ki, 11-ci sinif şagirdlərinin buraxılış imtahanında Azərbaycan dili fənni üzrə yüksək nəticə göstərən məktəblər arasında da Sumqayıt şəhəri Təbiət elmləri təmayüllü gimnaziyası ilk sıradadır.
Mənbə: Azedu.az
