Sumqayıt Dövlət Dram Teatrı 57-ci teatr mövsümünü başa vurub.
Teatrdan Sumqayit24.az-a verilən məlumata görə, iyulun 21-də rus dramaturqu Lev Ustinovun "Xilaskar qurbağa" əsəri əsasında səhnələşdirilmiş "Cəsur" adlı uşaq tamaşası nümayiş olunub.
Tamaşanın quruluşçu rejissoru Fuad Kazımov, rejissoru Ləman Məmmədli, quruluşçu rəssamı Osman Salmanov, Arif Müzəffər, Nizami Dadaşev, musiqi tərtibatçısı Telman Qəniyev, rəqslərin quruluşçusu Kamil Ağazadə, rejissor köməkçisi isə Fazilə Rzayevadır. Əsərin Azərbaycan dilinə tərcüməsi Xalq artisti Firudin Məhərrəmova məxsusdur.
Səhnə əsərində obrazları aktyorlar Məryəm Hüseynli, Sevda Cəlilova, İlham Səfərli, Habil Xanlarov, Şəms Abdullayeva və Günəş Bağırova canlandırıblar.
Səhnə əsəri dostluq, cəsarət, mərhəmət və ədalət kimi ümumbəşəri dəyərləri təbliğ edən alleqorik nağıl motivləri əsasında hazırlanıb.
