Maliyyə Monitorinqi Xidmətindən daxil olmuş məlumatlar əsasında “Sumqayıt Tibb Mərkəzi” PHŞ-dəki qanunsuzluqlara dair cinayət işinin istintaqı tamamlanıb. Sumqayıt24 bu haqda 23 avqust tarixində Baş Prokurorluğa istinadən xəbər verir.
Proses Korrupsiyaya qarşı Mübarizə Baş İdarəsində aparılıb. İstintaqla qeyd olunan tibb müəssisəsinin sabiq baş mühasibi Gülnarə Bayramovanın həmin vəzifədə işləyərkən qohumu Gündüz Əliyevlə qabaqcadan əlbir olaraq, tanışları Elxan Əsədovun köməkliyi ilə sahibkarlıq fəaliyyəti adı altında 2012-2019-cu illər ərzində keçirilmiş dövlət satınalmaları və müqavilələr üzrə xüsusilə külli miqdarda pul vəsaitlərini nağdlaşdıraraq mənimsəmələrinə əsaslı şübhələr müəyyən edilib.
Cinayət işi materiallarına əsasən, Gülnarə Bayramova və Gündüz Əliyev Elxan Əsədov vasitəsilə 41 hüquqi şəxsin qanuni fəaliyyətlə məşğul olması görüntüsü yaradıblar. Sonra onlar Sumqayıt şəhər Səhiyyə Şöbəsindən 5 milyon 716 min 684 manatın həmin şirkətlərə köçürülməsinə nail olublar.
Köçürülmüş puldan 1 milyon 613 min 334 manatı Elxan Əsədov və digərləri vasitəsilə nağdlaşdırılmaqla mənimsənilib.
Mənimsənilmiş vəsaitin 1 milyon 35 min manat məbləğində hissəsinin müxtəlif əqdlər bağlamaqla həyata keçirilən maliyyə əməliyyatları nəticəsində ayrı-ayrı şəxslərin bank hesablarından məxaric edərək leqallaşdırılması ibtidai istintaq zamanı sübuta yetirilib.
İş üzrə toplanmış mötəbər sübutlar əsasında Gülnarə Bayramovaya və Gündüz Əliyevə Cinayət Məcəlləsinin 179.4 (xüsusilə külli miqdarda ziyan vurmaqla mənimsəmə), 193-1.3.2 (xeyli miqdarda cinayət yolu ilə əldə edilmiş əmlakı leqallaşdırma) və digər maddələri, Elxan Əsədova isə həmin Məcəllənin 32.5, 179.4 (xüsusilə külli miqdarda ziyan vurmaqla mənimsəməyə köməklik), 32.5, 308.2 (ağır nəticələrə səbəb olan vəzifə səlahiyyətlərindən sui-istifadə etməyə köməklik) və digər maddələri ilə yekun ittiham elan edilib.
Cinayət işi baxılması üçün Sumqayıt Ağır Cinayətlər Məhkəməsinə göndərilib.
Bundan başqa, istintaq zamanı 41 hüquqi şəxs barəsində cinayət-hüquqi tədbirlərin tətbiq edilməsi barədə qərar qəbul edilib və dəymiş maddi ziyanın 1 milyon 542 min 351 manatının ödənilməsi təmin olunub.
