Sumqayıt şəhəri, 13-cü mikrorayon, bina 9A-nın yaxınlığında yaranan antisanitar vəziyyət sakinlərin narazılığına səbəb olub.
Sumqayit24.az-a müraciət edən vətəndaşların sözlərinə görə, ərazidə bir müddət əvvəl kimliyi məlum olmayan şəxslər tərəfindən tikinti işlərinə başlanılıb. Lakin yaxınlıqdan keçən elektrik xəttinə görə işlər dayandırılıb və tikili yarımçıq vəziyyətdə qalıb.
Yarımçıq tikilinin ətrafında yaranan antisanitariya, yayılan üfunət və zibil qablarının binalara həddindən artıq yaxın yerləşdirilməsi narahatlıq doğurur.
Müraciətdə qeyd olunur ki, zibil qabları binanın pəncərələrinin altına qədər yaxınlaşdırılıb. Bu isə həm insanların narahatlığına, həm də ərazidən keçidin çətinləşməsinə səbəb olur.
Sakinlərin sözlərinə görə, mövcud vəziyyətin aradan qaldırılması üçün ərazinin təmizlənməsi, yarımçıq tikilinin sökülməsi və zibil qablarının əvvəlki yerinə qaytarılması xahiş olunur.
