Sumqayıt şəhərinin Xəzər bağlarının dəniz istiqamətində yerləşən hissəsində yenidən antisanitar vəziyyət yaranıb.
Sumqayit24.az-a daxil olan məlumata görə, sözügedən ərazi məişət tullantıları ilə çirkləndirilib. Bu cür vəziyyət isə həm xoşagəlməz görüntü yaradır, həm də ətraf mühitə mənfi təsir göstərir.
Sakinlərin sözlərinə görə, ərazinin çirklənməsinə səbəb bəzi yerli sakinlərin tullantıları həmin əraziyə atmasıdır.
"Ən yaxın zibil qutuları dəniz sahilində yerləşir və bura təxminən 300 metr məsafədədir. Ora əhali üçün demək olar ki, uzaqdır. Ümumiyyətlə, Xəzər bağlarında həftə ərzində iki dəfə sakinlər məişət tullantılarını sellofan paketlərdə hasarlarından asırlar, mənzil-kommunal təsərrüfat işçiləri isə mütəmadi olaraq onları toplayırlar. Bu xidmətə görə sakinlər aylıq 4 manat ödəniş edirlər. Dəniz kənarına zibil atanlar isə yəqin ki, həmin aylıq ödənişi etmək istəməyən şəxslərdir", - deyə sakin iddia edib.
Sakin problemin həlli ilə bağlı da təkliflərini səsləndirib:
"Ərazi daimi nəzarətə götürülməli, zibil atılmasının qadağan olunduğunu bildirən xəbərdaredici lövhələr quraşdırılmalıdır. Həmçinin ərazini çirkləndirən şəxslər aşkar edildikdə onlar qanunvericiliyə uyğun şəkildə cərimələnməlidirlər".
Xatırladaq ki, Sumqayit24.az redaksiyası iyulun 9-da da sözügedən ərazidə antisanitar vəziyyətlə bağlı şikayət işıqlandırıb.
