"Akaray Grup İnşaat Ticarət İthalat və İhracat Limited" şirkətinin Azərbaycandakı filialının direktoru barəsindəki qərardan yenidən kassasiya şikayəti verilib.
Sumqayıtda çoxmərtəbəli bina tikintisi ilə bağlı dələduzluq ittihamı ilə mühakimə olunan Arif Mansurovun şikayətinə Ali Məhkəmənin hakimi Teyyub Muxtarovun sədrliyi ilə baxılacaq.
İttihama görə, Arif Mansurov ona müraciət edən iki nəfərin etibarından sui-istifadə edərək ümumilikdə 570 min manatı ələ keçirib.
Bildirilir ki, o, zərərçəkmişlərdən birini məhkəmənin əleyhinə qəbul etdiyi qətnaməni ləğv etdirəcəyinə inandırıb. Bunun üçün guya səlahiyyətli şəxslərə bahalı hədiyyələr alınacağını bildirərək ondan 170 min manat pul alıb.
Bundan başqa, Mansurov həmin şəxsi və onun tanışını Sumqayıt şəhərində çoxmərtəbəli yaşayış binasının tikintisinə icazə alacağına inandırıb. O, Dövlət Şəhərsalma və Arxitektura Komitəsindən tikintiyə icazə alınacağı adı ilə zərərçəkmişdən daha 400 min manat əldə edib.
Təqsirləndirilən şəxs istintaq dövründə zərərçəkmişlərə dəymiş maddi ziyanı ödəyib. Məhkəmə istintaqı zamanı isə ifadə verməkdən imtina edib.
Sumqayıt Ağır Cinayətlər Məhkəməsinin hökmü ilə Arif Mansurov 5 il müddətinə azadlıqdan məhrum edilib. Sonradan Sumqayıt Apellyasiya Məhkəməsi hökmü qüvvədə saxlayıb.
Qeyd edək ki, iş üzrə daha əvvəl Ali Məhkəmədə keçirilən iclasda kassasiya şikayətinin geri götürüldüyü açıqlanmışdı. Bununla belə, məlum olub ki, iş üzrə qərardan yenidən kassasiya şikayəti verilib.
Mənbə: Pravda.аz
