Sumqayıtda çəyirtkələrin yenidən artdığı müşahidə olunur.
Bu barədə Sumqayit24.az-a şəhər sakinləri məlumat veriblər.
Vətəndaşların sözlərinə görə, şəhərin müxtəlif ərazilərində, xüsusilə Sumqayıt bulvarında, "Göyərçin" abidəsinin yaxınlığında, 18-ci və 48-ci məhəllələrdə, Şəhidlər xiyabanında, "Bağça Şəhər" yaşayış kompleksində, eləcə də bir sıra mikrorayonlarda çəyirtkələrin sayı xeyli artıb. Sakinlər Saray qəsəbəsində də belə vəziyyətin müşahidə olunduğunu bildirirlər.
Şikayətçilərin məlumatına əsasən, bir müddət əvvəl ərazidə dezinseksiya tədbirləri aparılsa da, hazırda çəyirtkələrin sayı əvvəlkindən də çoxdur.
"Nə pəncərəni rahat aça bilirik, nə də binadan rahat şəkildə çölə çıxa bilirik. Xahiş edirik ki, aidiyyəti qurumlar tərəfindən yenidən daha effektiv tədbirlər görülsün", - deyə sakinlər narahatlıqlarını ifadə ediblər.
Qeyd edək ki, Sumqayit24.az bu il iyulun 3-də də Sumqayıtda çəyirtkələrin artması ilə bağlı sakinlərin şikayətlərini işıqlandırıb.
