Fövqəladə Hallar Nazirliyinin (FHN) Sumqayıt Regional Mərkəzinin əhatə etdiyi ərazidə yerləşən qurumların struktur bölmələri və ərazi obyekt qüvvələri ilə taktiki-xüsusi təlim keçirilib. Bu haqda 30 aprel tarixində Sumqayıt24 Apa.az-a istinadən xəbər verir.
Təlim “Fövqəladə hallar zamanı Fövqəladə Hallar Nazirliyinin qurumlarının qarşılıqlı fəaliyyətinin təşkili” mövzusunu əhatə edib.
Burada FHN Aparatının və qurumlarının məsul şəxsləri, idarə, müəssisə və təşkilatların, həmçinin yerli özünüidarəetmə orqanlarının əməkdaşları və şəhər rəhbəri Zakir Fərəcov iştirak ediblər.
Tədbirə ümumilikdə FHN-in 89 ədəd texnikası və 639 nəfərdən ibarət şəxsi heyəti, 3 baş xüsusi təlim görmüş iti, 1 helikopteri, ərazi və obyekt qüvvələri cəlb edilib.
Təlim zamanı şərti olaraq baş vermiş təbii fəlakət nəticəsində yaranmış vəziyyətin qiymətləndirilməsi, qüvvə və vasitələrin hazır vəziyyətə gətirilməsi, hadisəyə çevik reaksiya verilməsi, habelə kəşfiyyat, axtarış-xilasetmə və qarşılıqlı fəaliyyətin təşkili üzrə komandir-rəis heyətinin fəaliyyətləri təşkil olunub.
Sonda əldə edilmiş nəticələrin müzakirəsi məqsədilə toplantı keçirilib, müvafiq tapşırıqlar verilib.
