Sumqayıtda prospektlərdən birində gecə saatlarında aparılan təmir işləri sakinlərin narazılığına səbəb olub.
Sumqayit24.az-a daxil olan məlumata görə, Heydər Əliyev prospektində, Nəriman Nərimanov adına Mədəniyyət Mərkəzinin qarşısında kanalizasiya və su xətlərində təmir işləri aparılır.
Ərazidə yaşayan sakinlər iddia edirlər ki, işlər artıq bir neçə gündür hissə-hissə davam edir və gecə saatlarında istifadə olunan texnikanın yaratdığı səs-küy onların istirahətinə mane olur.
"Çəkdiyim video gecə saat 01:00-a aiddir. Səs-küydən yata bilmirik", - deyə sakin narazılığını ifadə edib.
Sakinlər aidiyyəti qurumlardan təmir işlərinin daha qısa müddətdə başa çatdırılmasını və gecə saatlarında yaranan səs-küy probleminin nəzərə alınmasını xahiş edirlər.
