Sumqayıtda yerləşən Təbiət Elmləri Təmayüllü Gimnaziya bu il yüksək nəticə göstərən məzunları ilə diqqət çəkib.
Sumqayit24.az-a daxil olan məlumata görə, gimnaziyanın 11 "A" sinfində təhsil alan 20 şagirddən 19-u məktəbi qırmızı fərqlənmə attestatı ilə başa vurub.
Məzunlardan biri - Samir Tağızadə qəbul imtahanında ölkə üzrə yeganə 700 bal toplayaraq ən yüksək nəticəyə imza atıb. Gimnaziyanın digər məzunu İnci Mursaquliyeva isə IV ixtisas qrupu üzrə qəbul imtahanında 400 bal toplayıb. O, bundan əvvəl buraxılış imtahanında 290,2 bal nəticə göstərib.
Bundan başqa, Sumqayıt şəhəri Təbiət Elmləri Təmayüllü Gimnaziyası buraxılış imtahanlarının nəticələrinə əsasən Azərbaycan dili, ingilis dili və riyaziyyat fənləri üzrə ölkənin ən yüksək nəticə göstərən məktəbləri sırasında ilk yeri tutub.
Belə ki, 11-ci sinif şagirdlərinin buraxılış imtahanında məktəbin 62 məzunu buraxılış imtahanında iştirak edib və onların orta bal göstəricisi ingilis dili fənni üzrə 94.57, Azərbaycan dili fənni üzrə 92.44, riyaziyyat fənni üzrə isə 93.75 % olub.
Gimnaziya bu göstəricilərlə buraxılış imtahanlarında ölkə birincisi olub.
