Fövqəladə Hallar Nazirliyi (FHN) “Məktəblinin dostu” layihəsinin iştirakçıları üçün Regional Mərkəzdə, o cümlədən Sumqayıt şəhər 1 və 31 nömrəli məktəblərdə maarifləndirici təlimlər keçirib.
Sumqayit24.az xəbər verir ki, “Fövqəladə hallar zamanı davranış qaydaları” mövzusunda görüşlərdə Nazirliyin aidiyyəti strukturlarının və Abşeron-Xızı Regional Təhsil İdarəsinin əməkdaşları, “Məktəblinin dostu” layihəsinə cəlb olunan şəxslər və yuxarıda adları qeyd olunan məktəblərin kollektivi iştirak edib.
Təlimlərin nəzəri hissəsində fövqəladə hallar, o cümlədən yanğınlar zamanı zəruri davranış qaydaları, fövqəladə hallar zamanı ilkin psixoloji yardımın göstərilməsi və təxliyənin təşkili barədə ətraflı məlumat verilib, mövzulara dair videoçarxlar nümayiş olunub.
Təlimlərin praktiki hissəsində şərti yanğın zamanı “Həyəcan” siqnalı verildikdən sonra məktbə kollektivinin təxliyə planına uyğun olaraq təhlükəsiz yerə təxliyəsi həyata keçirilib, “yanğınla” mübarizə tədbiri simulyasiya edilib. Həmçinin tədbir iştirakçılarına “zərərçəkmişlərin” xilas edilməsi və ilkin yardımın göstərilmə qaydası nümayiş olunub.
Daha sonra iştirakçılara xilasetmə alət və avadanlıqları barədə məlumat verilib. Sonda isə “Məktəblinin dostu” layihəsinə cəlb olunan şəxslərə sertifikatlar təqdim edilib.
