Sumqayıt şəhərinin Sülh prospektində asfalt örtüyündəki çatlar xüsusi polimer-bitum mastikası ilə doldurulur.
Görülən işlərin məqsədi yağıntı sularının yolun əsasına sızmasının və asfalt örtüyünün zədələnməsinin qarşısını almaqdır. Sumqayit24.az-a müraciət edən sakin bildirib ki, təmir aparılan ərazidə heç bir xəbərdaredici nişan və ya sürət məhdudiyyəti barədə məlumat yerləşdirilməyib.
Şikayətçinin iddiasına görə, nəticədə həmin hissədən keçən avtomobillərin üzərinə hələ bərkiməmiş mastika sıçrayır. Bu maddə avtomobillərin kuzovuna yapışaraq adi yuma ilə təmizlənmir və sürücülər onu çıxarmaq üçün əlavə xüsusi təmizləyici vasitələr almağa məcbur olurlar.
Sakin məsul qurumlardan təmir işləri zamanı yol hərəkəti iştirakçılarının vaxtında məlumatlandırılmasını, xəbərdaredici nişanların quraşdırılmasını və sürücülərin əmlakına ziyan vura biləcək halların qarşısının alınmasını xahiş edir.
