Sumqayıt şəhəri, 34-cü məhəllədə parklanma problemi sakinlərin gündəlik həyatını çətinləşdirir.
Sumqayit24.az-a müraciət edən sakinlərin sözlərinə görə, həyətlərdə avtomobillər üçün yer qalmayıb. Onlar iddia edirlər ki, məhəllədəki avtomobillərin yalnız 9-u sakinlərə məxsusdur. Digər nəqliyyat vasitələri isə alış-veriş üçün "Kolxoz bazarı"na gələn şəxslərə və ərazidəki obyektlərin əməkdaşlarına aiddir.
Nəticədə həyətlər avtomobillərlə dolur, sakinlərin hərəkəti məhdudlaşır. Vəziyyət o həddə çatıb ki, təcili tibbi yardım və yanğınsöndürənlərin məhəlləyə daxil olması belə çətinləşir.
Bir sözlə - məhəllədə yaranmış vəziyyət həm gündəlik gediş-gəlişə, həm də zəruri hallarda təcili xidmətlərin əraziyə çatmasına mane olur.
Vətəndaşlar aidiyyəti qurumlardan parklanma probleminin həlli, həyətlərin avtomobillərlə tutulmasının qarşısının alınması və məhəlləyə sərbəst giriş-çıxışın təmin edilməsi üçün tədbirlər görülməsini istəyirlər.
